DAAB — Birliyin təsisi

Konsept

DAAB-ın yaradılmasının əsaslandırılması və diaspor elmi potensialının vahid platformaya çevrilməsi.

Xronologiya

Şuşa Qurultayından İstanbul təsis görüşünə qədər davam edən təşkilatlanma xətti.

Toplantı

İştirakçılar, məqsədlər, müzakirələr, fotoqalereya və video materialları.

Təsis Zərurəti

🏛️ DAAB-ın yaradılmasının əsasları

Dünya Azərbaycanlı Alimlər Birliyinin yaradılması Azərbaycan diasporunda elm xadimlərinin təşkilatlanması, vahid platformada birləşməsi və Azərbaycanın strateji inkişafına daha sistemli töhfə verməsi zərurətindən doğmuşdur.

22 aprel 2022-ci il tarixində Qarabağın incisi Şuşa şəhərində Dünya Azərbaycanlıların V Qurultayı təşkil edilmişdir. Azərbaycanın müstəqillik tarixində mühüm və əhəmiyyətli tarixi hadisələrdən hesab olunan bu qurultayda 65 ölkədən 400 nəfərə yaxın soydaşımız iştirak etmişdir.

İşğaldan azad edilmiş torpaqlarımızda təşkil edilmiş ən böyük tədbirlərdən hesab edilən Qurultayda ölkə başçısı, Silahlı Qüvvələrin Ali Baş Komandanı, cənab İlham Əliyevin söylədiyi ətraflı, çoxşaxəli nitqi günü-gündən inkişaf etməkdə olan Azərbaycan diasporunun qarşısına böyük vəzifə və məsuliyyət qoymuşdur.

Məhz Prezident İlham Əliyevin tapşırıqlarına əsasən, bu gün diasporun daha mütəşəkkil formada inkişafı üçün məqsədyönlü fəaliyyət aparılmaqdadır.

Öz fərqliliyi və potensialı baxımından zənginliyi ilə seçilən Azərbaycan diasporunda elm xadimlərinin, alimlərin yer alması diasporumuzun daha da inkişaf etməsi baxımından böyük perspektivlər vəd etməkdədir.

İstər qurultay zamanı, istərsə də qurultaydan sonrakı dövrlər ərzində yeni-yeni azərbaycanlı alim və elm adamları ilə yaxından tanışlıq imkanımız olmuş, gələcəkdə qarşılıqlı əməkdaşlıq imkanları haqqında fikir mübadiləsi aparılmışdır.

Azərbaycan Respublikası Diasporla İş üzrə Dövlət Komitəsinin (DİDK) dəstəyi ilə biz, bir qrup azərbaycanlı ziyalı diasporumuzda təmsil olunan alimlərin təşkilatlanmasının zəruriliyini rəhbər tutaraq, qarşımıza hamımızı birləşdirəcək vahid bir platformanın yaradılması məqsədini qoyduq.

Bu niyyətimizi həyata keçirmək üçün Türkiyədə toplandıq və “Dünya Azərbaycanlı Alimlər Dərnəyinin” (DAAB) təməlini atdıq.

İstanbul Təsis Görüşü

🗺️ 9 dekabr 2022 — İstanbul

İstanbul təsis görüşü

Toplantı 9 dekabr 2022-ci il tarixində DİDK nümayəndələrinin və müxtəlif ölkələrdən təşrif gətirmiş azərbaycanlı elm xadimlərinin iştirakı ilə İstanbul şəhərində baş tutdu.

9 dekabr 2022-ci il tarixində İstanbul şəhərində Dünya Azərbaycanlı Alimlər Birliyinin təsis görüşü keçirildi (Məqalə)

Video Azərbaycan Respublikasının Diasporla İş üzrə Dövlət Komitəsi tərəfindən hazırlanmışdır.

Görüşdə dünyanın müxtəlif ölkələrində yaşayan Azərbaycanlı elm xadimləri ilə yanaşı Diasporla İş üzrə Dövlət Komitəsi (DİDK), Təhsildə Keyfiyyət Təminatı Agentliyi (TKTA), Türkiyə Azərbaycan Dərnəkləri Federasiyası (TADF) və Türkiyə Elmlər Akademiyasının nümayəndələri də iştirak etdilər:

Ad, Soyad	Vəzifə
Ahmet Cevat Acar	Türkiyə EA İH üzvü, İstanbul Sabahattin Zaim Universitetinin rektoru
Cahid Kazımov	DİDK sədrinin müşaviri
Emin Rüstəmov	Beynəlxalq əlaqələr və gənclərlə iş şöbəsinin gənclər sektorunun müdiri
Fuad Muradov	Diasporla İş üzrə Dövlət Komitəsinin sədri
Pərviz Məmmədzadə	Türkiyə Azərbaycan Dərnəkləri Federasiyasının sədr müavini
Rüfət Sarabin	DİDK aparıcı məsləhətçisi
Ülkər Səttarova	Təhsildə Keyfiyyət Təminatı Agentliyinin sədri
Vəsilə Zeynalova	Təbliğat, informasiya və analitik təhlil şöbəsinin müdiri
Xıdır Kazımov	Beynəlxalq əlaqələr və gənclərlə iş şöbəsinin müdiri

Görüşdə iştirak etmiş Azərbaycanlı elm xadimləri

Ad, Soyad & Yaşadığı Ölkə
Akif Alaferdov Qırğızıstan	Aqşin Əliyev Çin	Arzu Qurbanova Qazaxıstan	Bəxtiyar Siracov Avstriya
Əli Əsgərov ABŞ	Əmirullah Mehmetov Türkiyə	Əsgər Ələkbərov Oman	Feridun Hamdullahpur Kanada
Heydər İmanov Rusiya	Mahmud Hacıxəlilov Gürcüstan	Mehdi İsmayılov Türkiyə	Məsud Əfəndiyev Almaniya
Mübariz Qarayev S. Ərəbistanı	Niyazi Niyazov Rusiya	Ramin Sadık Türkiyə	Rövşən İbrahimov Koreya
Səadət Kərimi İsveç	Seymur Nəsirov Misir	Teymur Rzayev Türkiyə	Toğrul İsmayıl Türkiyə
Vüqar İmanbəyli Türkiyə	Xaqani Qayıblı Estoniya	Xəlil Kələntər Yaponiya	Zaur Sadıqbəyli Fransa

Əsas Hədəflər

Xaricdə fəaliyyət göstərən azərbaycanlı alimlərin vahid bazasının yaradılması
Elm xadimləri və tədqiqatçılar arasında şəbəkələşmənin gücləndirilməsi və vahid platformada birləşdirilməsi
Diaspor fəaliyyətinə töhfə verilməsi və qlobal elmi əməkdaşlıqda rolunun artırılması
Vətənlə əlaqələrin möhkəmləndirilməsi və Azərbaycan elmi institutları ilə sıx əməkdaşlığın təşviq edilməsi
Müxtəlif elmi və təhsil proqramları vasitəsilə Azərbaycanın inkişafına dəstək verilməsi
İşğaldan azad edilmiş ərazilərin bərpası və yenidən qurulması prosesinə töhfə verilməsi
Elmi fəaliyyət göstərən gənc nəslə dəstək verilməsi
Müxtəlif təhsil layihələrinin hazırlanması və elmi işlərin davamlı dəstəklənməsi

İştirakçılar qruplara bölünərək müzakirələr apardılar

Təklif Edilmiş Strateji Addımlar

Təşkilatlanma

Regional qruplar formalaşdırılsın və hər qrupun üzvləri ilə rəhbərləri təyin edilsin.
DAAB-ın idarəetmə və fəaliyyət strukturu müəyyənləşdirilsin.
Qısa, orta və uzunmüddətli strateji yol xəritəsi hazırlanaraq icra edilsin.
DAAB-ın birinci forumu Bakı və ya Ağdamda keçirilsin.

Rəqəmsal Platforma

Alimlər arasında qlobal əməkdaşlıq üçün vahid elmi platforma və şəbəkə qurulsun.
DAAB-ın rəsmi veb saytı və mobil tətbiqi yaradılsın.
Rəsmi sosial media hesabları açılsın və rəqəmsal təhlükəsizlik tədbirləri görülsün.

Elmi Fəaliyyət

Alimlərin məqalə, kitab və tədqiqatlarını əhatə edən elmi informasiya bazası formalaşdırılsın.
İldə dörd dəfə beynəlxalq səviyyəli elmi jurnal dərc edilsin.
Alimlər yaşadıqları ölkələrin xüsusiyyətlərinə uyğun tədqiqatlar və arxiv araşdırmaları aparsınlar.

Gənc Alimlər

Gənc alimlər üçün Azərbaycandan və xarici ölkələrdən elmi rəhbərlərin iştirakı ilə mentorluq proqramı yaradılsın.
Gənc tədqiqatçıların inkişafına yönəlmiş proqramlar həyata keçirilsin.
"Qarabağ" və "Şuşa" adları ilə xüsusi təqaüdlər təsis edilsin.

Beynəlxalq Tanıtım və Əməkdaşlıq

Xaricdə çalışan azərbaycanlı alimlərin elmi və ictimai mühitdə tanıdılması üçün təşviq işləri aparılsın.
Azərbaycan alimlərinin AMEA üzvlüyü məsələsi nəzərdən keçirilsin.
Ekoloji mühit, "ağıllı şəhər" və digər innovativ layihələrə dəstək verilsin.
İş adamları elmi layihələrin maliyyələşdirilməsinə və əməkdaşlıq proseslərinə cəlb edilsin.
Alimlərin yaşadıqları ölkələrin dilini bilməsi üçün mütəxəssis hazırlığına dəstək verilsin.

Alınmış Qərarlar

Avropa, Türkiyə, Ərəb ölkələri və Afrika, Rusiya, Mərkəzi Asiya, Uzaq Şərq, Amerika və Avstraliya üzrə qruplar formalaşdırılsın
Görüşün nəticəsi olaraq yaradılması nəzərdə tutulan təşkilat «Dünya Azərbaycanlı Alimlər Birliyi» adlandırılsın
Təşkilatın nizamnaməsi hazırlansın
Xaricdə yaşayan Azərbaycanlı Alimlərin birinci forumu Bakıda keçirilsin

İdarə heyəti aşağıdakı tərkibdə qəbul edilsin:

Feridun Hamdullahpur	Sədr
Məsud Əfəndiyev	Həmsədr
Bəxtiyar Siracov	Üzv
Səadət Kərimi	Üzv
Seymur Nəsirov	Üzv
Toğrul İsmayıl	Üzv
Zaur Sadıqbəyli	Üzv

Loqomuz

Toplantı çərçivəsində Dünya Azərbaycanlı Alimlər Birliyinin (DAAB) korporativ kimliyinin vizual dizaynının hazırlanması məsələsi gündəmə gəldi. Həmin vaxt bu işin icrası üçün Prof. Dr. Teymur Rzayev öz dəstəyini təklif etdi və görüşün sonunda bu məsuliyyət ona həvalə edildi.

Prof. Dr. Teymur Rzayev tərəfindən, təxminən 40-a yaxın fərqli loqo eskizi hazırlanaraq qiymətləndirilmək və seçim üçün DAAB-nin İdarə Heyətinə və Diaspor Komitəsinə təqdim olundu. Geniş rəy mübadiləsi və ətraflı dəyərləndirmə prosesi nəticəsində təqdim edilən variantlar arasından bir loqo yekdilliklə seçildi.

Seçilmiş loqonun texniki dizaynı Prof. Dr. T. Rzayevin rəhbərliyi ilə onun azərbaycanlı tələbəsi Nilüfər Xəlilova tərəfindən hazırlanmışdır.

Hazırda bu loqo DAAB-nin rəsmi simvolu kimi bütün yazışmalarda, təqdimatlarda və digər rəsmi sənədlərdə aktiv şəkildə istifadə olunmaqdadır. Bu loqo yalnız vizual tanıtım vasitəsi deyil, eyni zamanda birliyin elmi, mədəni və peşəkar dəyərlərini təcəssüm etdirən simvolik bir elementdir.